ഡോ. എം.വി. പിള്ള കൈനിക്കരയിലെ വിശ്വപൗരൻ

Book Name in English : Dr M V Pillai Kainikkarayile Vishwapouran

ഡോ. എം.വി. പിള്ള ഇന്ന് ലോകമെങ്ങും സൃഷ്ടിച്ചിട്ടുള്ള വിശാലമായ സൗഹൃദത്തിന് കാരണം കാന്തികമണ്ഡലം പോലെ അദ്ദേഹത്തിന് ചുറ്റും വിലയം ചെയ്യുന്ന സഹൃദയത്വവും സഹഭാവവും നർമ്മവും ധർമ്മബോധവുമാണ്. വ്യാപരിക്കുന്ന മേഖലയിൽ പോലും അവഗാഹമുള്ളവരെ കണ്ടെത്താൻ വിഷമിക്കുന്ന ഈ കാലഘട്ടത്തിൽ ഏതുവിഷയത്തിലും എം.വി.പിള്ളയെപ്പോലെ ഗഹനത ആർജ്ജിച്ചിട്ടുള്ള ഒരു ഭിഷഗ്വരൻ അപൂർവ്വമാണ്. സാഹിത്യമോ, കലയോ ശാസ്ത്രമോ എന്തുമാകട്ടെ അതെക്കുറിച്ച് പ്രബന്ധം എഴുതാനോ പ്രഭാഷണം തയ്യാറാക്കാനോ എം.വി.പിള്ളയോട് ആവശ്യപ്പെട്ടാൽ അനുകരിക്കാനാവാത്ത മികവോടെ സൂക്ഷ്മമായി സർഗ്ഗാത്മകതയോടെ നർമ്മത്തിൽ ചാലിച്ച് അത് അവതരിപ്പിക്കാനുള്ള അദ്ദേഹത്തിൻ്റെ കഴിവ് അനന്യമാണ്. ’കൈനിക്കരയിലെ വിശ്വപൗരൻ’ എന്ന ഈ പുസ്‌തകത്തിൽ ചേർത്തിട്ടുള്ള എം.വി.പിള്ളയുടെ രചനകൾ എൻ്റെ വാക്കുകളെ സാധൂകരിക്കുന്നു. ലോകമെങ്ങുമുള്ള വൈദ്യശാസ്ത്ര വിദ്യാർത്ഥികളുടെ സ്നേഹവും ആദരവും ആർജ്ജിച്ചിട്ടുള്ള എം.വി. പിള്ള താരതമ്യം ചെയ്യാനാവാത്ത അദ്ധ്യാപകനും മാർഗ്ഗദർശിയുമാണ്. പരസഹായവും കരുതലും ജീവിതനിഷ്ഠ ആയതിനാലാവാം എം.വി. പിള്ള ഇത്രമേൽ സ്നേഹിക്കപ്പെടുന്നത്. ’കൈനിക്കരയിലെ വിശ്വപൗരൻ’ എന്ന ഈ പുസ്‌തകത്തിൻ്റെ താളുകൾ എം.വി. പിള്ള എന്ന പ്രതിഭയുടെ ബഹുമുഖവ്യക്തിത്വത്തിലേക്ക് വെളിച്ചം വീശുന്നു. അദ്ദേഹത്തിന് നൽകാനാകുന്ന ഏറ്റവും നല്ല പിറന്നാൾ സമ്മാനമാണ് ഈ പുസ്ത‌കം. എം.വി.പിള്ളയെ സ്നേഹിക്കുന്ന, ഇഷ്ടപ്പെടുന്ന എല്ലാവർക്കും ഈ അശീതി പുസ്‌തകം ആഹ്ളാദം പകരുമെന്ന കാര്യത്തിൽ സംശയമില്ല.
ഡോ. കെ.വി. കൃഷ്ണദാസ്
(മുൻ ഡയറക്ടർ, പ്രൊഫസർ ഒഫ് മെഡിസിൻ.
മെഡിക്കൽ കോളേജ് ഹോസ്‌പിറ്റൽ, തിരുവനന്തപുരം)