ഒരു കപ്പിത്താന്റെ യാത്ര

Book Name in English : Oru Kappithante Yathra

കോട്ടയം ജില്ലയിലെ പൈങ്ങളം എന്ന പിന്നോക്ക ഗ്രാമത്തിലെ ഒരു ദരിദ്ര കർഷക കുടുബത്തിൽ ജനിച്ച ചാക്കോ, കേരളത്തിൻ്റെ ആദ്യ കപ്പലായ MV കൈരളിയെന്ന ചരക്കുകപ്പലിൻ്റെ കപ്പിത്താൻ -ക്യപ്റ്റൻ മരിയ ദാസ് ജോസഫ് ആയതിനു പിന്നിൽ സഹനത്തിൻ്റെയും സാഹസികതയുടെയും അതിലുപരി നിശ്ചയദാർഢ്യത്തിൻ്റെയും അവിശ്വാസനീയമായൊരു അധ്യായമുണ്ട്.
കത്തോലിക്കാ സഭയുടെ വൈദികനാകാനുള്ള ആഗ്രഹത്താലോ, അതോ താൻ വീട്ടിൽ നിന്ന് മാറിനിന്നാൽ ഒരു വയർ കുറച്ചു ഊട്ടിയാൽ മതിയെന്ന് കരുതിയിട്ടോ, സെമിനാരിയിൽ ചേരുന്നുവെങ്കിലും കുഞ്ഞു ചാക്കോ വൈദിക പഠനം പൂർത്തിയാക്കാതെ മടങ്ങേണ്ടി വരുന്നു. തുടർന്ന് ജീവിതം കരുപ്പിടിപ്പിക്കാൻ മദ്രാസിലേക്ക് ഒളിച്ചോടുന്നു. അവിടെ ബ്രിട്ടീഷ് നേവിയിൽ റേഡിയോ ഓപ്പറേറ്റർ ആയിരിക്കെ, 1946 ലെ ബ്രിട്ടീഷ്‌കാർക്കെതിരായ സായുധ കലാപത്തിൽ, തൂക്കുകയർ വരെ കിട്ടാവുന്ന അട്ടിമറി ദൗത്യം ഏറ്റെടുക്കുന്നു. അതിനു ശേഷം വീണ്ടും ഒളിച്ചോടൽ, ജോസഫായി ആൾമാറാട്ടം. സ്വതന്ത്ര ഇന്ത്യയിൽ മർച്ചൻ്റ് നേവിയിൽ സമുന്നത പദവിയിലെത്തുന്നു. സാഹസികവും സംഭവബഹുലവുമായ ആ ജീവിതമാണ് അദ്ദേഹത്തിന്റെ മകൻ ലെഫ്റ്റനന്റ് കേണൽ തോമസ് ജോസഫ് “ദ മാസ്റ്റർ മാറിനർ“ എന്ന ഇംഗ്ലീഷ് ബുക്കിലൂടെ സമർത്ഥമായി വരച്ചു കാട്ടിയിരിക്കുന്നത്. ആ രചനയുടെ ശൈലിയും സാരാംശവും ഒട്ടും ചോരാതെയുള്ള മലയാളം പരിഭാഷ ഇതാ!
1979 ജൂണിൽ മർമഗോവയിൽ നിന്ന് 20000 ടൺ ഇരുമ്പയിരുമായി ജർമ്മനിയിലേക്ക് തിരിച്ച് ദുരന്തപര്യവസായി ആയി മാറിയ, കൈരളിയുടെയും 51 യാത്രക്കാരുടെയും അന്ത്യയാത്രയുടെ പുനരാവിഷ്‌കാരം ഏതൊരാളുടെയും മിഴികളെ ഈറനണിയിക്കും. യാത്രാ മദ്ധ്യേ അപ്രത്യക്ഷമായ കൈരളി എന്നും മലയാളിക്കൊരു പ്രഹേളികയായിരുന്നു. 45 വർഷങ്ങൾക്കുശേഷം ആ നിഗൂഢതയുടെ മറനീക്കുകയാണ് ഈ ജീവിതരേഖ.